GIPASIDUNGGAN sa Eastern Mindanao Command ang mga sundalo nga naangol atol sa engkuwentro sa Davao del Sur.

Sumala ni Commander Lieutenant General Felimon Santos Jr., tulo ka mga sundalo ang ilang napasidunggan nga pulos mga personahe sa 1002nd Infantry Brigade, Philippine Army.

Ang pasidungog gihimo atol sa pagbisita ni Santos sa Camp Panacan, Station Hospital, Naval Station Felix Apolinario, Panacan, Davao City niadtong Huwebes, Hulyo 4.

Ang tulo ka sundalo kabahin sa gikurpo nga elemento sa 1002nd Infantry Brigade nga gilangkuban sa 39th Infantry Battalion ug 2nd Scout Ranger Battalion.

Naka-engkuwentro sa mga sundalo ang wala maihap nga mga sakop sa Communist Terrorist Group (CTG) didto sa Brgy. Abnate, Kiblawan, Davao del Sur niadtong Lunes, Hulyo 1.

Miresponde ang mga sundalo sa lugar human sila makadawat og impormasyon nga dunay mga rebelde nga nangilkil sa dapit.

Ang tulo ka mga sundalo mao sila Sgt. Kenneth O Balicot kinsa nakaangkon og samad sa tiil dihang naigo sa M203 splinter; Cpl. Melgar B Requiron dunay samad sa ulo, ug si Cpl. Randy T Bacarro, nga dunay igo sa iyang abaga.

“We appreciate your display of the finest tradition of soldiery. You courageously and unselfishly responded to the call of duty to ensure the safety of our communities. With these, you brought honor not only to your self and the Armed Forces but also to the communities whom we are serving,” ingon ni Lt Gen. Santos. (Jeepy P. Compio)