MALITA, Davao Occidental -- Nanghatag og bugas ang lokal nga panggamhanan ngadto sa 30 ka mga barangay sa lungsod aron matabangan ang mga indibiduwal nga persons under close monitoring (PUCMs) nga gipailawom sa 14-day mandatory quarantine.

Tumong ni Malita Mayor Bradly Bautista nga pakusgan pa ang ilang kampanya batok sa coronavirus disease 2019 (Covid-19), hinungdan nga gitahasan ang mga opisyal sa barangay palig-unon ang ilang quarantine program.

Mga PUCMs nga gi-kwarentinas nakauli pinaagi sa Balik Probinsya Program (BPP) sa nasyonal nga kagamhanan, mga locally stranded individuals (LSIs) ug mga nanguli nga overseas Filipino workers (OFWs).

Matud ni Bautista nga angayang hatagan og suporta ang mga PUCMs samtang anaa sila kwarentinas diin apil nga maka-benepisyo ang ilang pamilya.

Nagpahimangno sab ang lokal nga panggamhanan ngadto sa mga buot mogawas sa ilang probinsiya nga mag-andam og tulo ka kopya sa travel manefisto diin ihatag sa checkpoint sa Barangay Buhangin ug sa lungsod sa Sta. Maria.

Ang usa ka kopya taguon sa mogawas nga indibiduwal mao nga kinahanglang ipa-xerox kining daan sa di pa molakaw aron di matanggong sa mga checkpoints.

Samtang, giawhag ni Governor Claude Bautista ang publiko nga suportahan ang ilang Bida programa kontra Covid-19 (Bawal walay mask, I-sanitize ang kamot, D-istansya sa ubang tawo og usa ka metro, A-ksyon base sa tinuod nga impormasyon).

Sumala sa gobernador nga kung kontra-Bida ang Covid-19, angayan nga ang tanan mahimong Bida. (Orlando B. Dinoy)