DAVAO ORIENTAL -- Mokabat 32 ka mga gikonsiderang notorius drug pushers ug mga high-value targets (HVTs) ang nasikop sa kapulisan sa Davao Oriental atol sa gikasa nga operasyon, niadtong Biyernes, Septyembre 21.

Sumala ni Police Regional Office (PRO)-Davao Spokesperson Chief Inspector Milgrace Cajes Driz nga resulta kini sa giimplementar sa kapulisan nga mga search warrants.

Usa ka hiniusang puwersa sa otoridad ang gilusad subay sa search warrants nga gipagula ni Hon Judge Nino Batingana, executive judge sa Regional Trial Court (RTC) Branch 6, sa Mati City, Davao Oriental batok sa usa ka Renato Matundo, alyas Ricky usa ka Rank No. 4 sa provincial level (PTL/HVT).

Sa maong implementasyon, miresulta sa pagkasikop sa laing 31 ka mga indibiduwal (wa una gipagula ang mga pangalan) diin nakuha sa ilang mga posisyon ang gituohang shabu nga mokantidad og P120,000.00 ug laing 50 gramos nga dunay kantidad nga P2,250 ug ang 15 gramos nga dunay street value nga P675.

Lakip sa nakuha sa mga dinakpan ang usa ka .38 caliber (Homemade Pistol) nga dunay duha ka mga buhing bala; usa ka .45 caliber nga dunay serial no. 281251 nga dunay usa ka buhing bala ug pito ka mga motorsiklo.

“The result of this operation reflects the untiring effort of our field commanders and operating troops to do their assigned task and untiringly serve the community well. We all dream of a drug free region so, together, we will do our best to achieve peace and we will continue this effort until we see more significant results lies ahead," sumala ni PRO-Davao director Chief Superintendent Marcelo Morales.

Gipangbalhog ang 32 ka mga dinakpan sa mga mga presinto sa Davao Oriental Provincial Police Office ug pangkasohan sa paglapas sa Republic Act 9165 kon Comprehensive Dangerous Drug Act of 2002 ug RA 10591 kon Comprehensive Firearms and Ammunition Law. (Jeepy P. Compio)