UPAT ka mga tsimosa kun gitawag nga "Marites" sa netizens karon ang gipabarangay sa usa ka inahan gumikan gipanabi ang iyang anak nga dunay kahabal.

Niadtong Huwebes, Enero 20, subay sa kasaligan nga impormante sa Superbalita Davao, nag-abot suma pa sa Barangay Mandug, Buhangin District, Davao City ang reklamante ug ang upat nga gireklamo.

Nasayran nga hilabihan ang kasuko sa usa ka ginang dihang nabandilyo sa ilang kalye ang ngalan sa iyang anak nga giingong ginahatud-sundo sa usa ka lalaki nga dunay kotse.

Gi-tsismis kini sa upat ka silingan nga maoy sumsuman sa ilang panagtapok sayo sa buntag sa usa ka purok sa maong barangay.

Wala na suma pa napugngan sa inahan dihang nasultihan sab kini sa usa ka silingan nga ang iyang anak ang punay gilibak sa iyang upat ka mga silingan.

Nadugangan ang iyang kapungot dihang nadamay na iyang pangalan isip usa ka inahan nga wa suma pa kabadlong sa iyang anak.

Sa miaging semana, misaka sa Barangay Mandug ang inahan ug gipa-summon-nan ang iyang upat ka mga silingan.

Sa pagsuwat ning balita Martes, Enero 25, giingon nga ugmang adlawa mag-abot na sab sila sa barangay diin mga miyembro na sa Lupong Tagapamayapa ang mohusay kanila.