MALALAG, Davao del Sur -- Nag-alayon ang kapulisan sa lungsod ug mga kabaro gikan sa Braulio E. Dujali Municipal Police Station sa Davao del Norte aron isilbi ang orden de aresto batok sa lalaking wanted sa kasong pagpanglugos.

Ang suspek nailhang si Romelo Densing Loyola, 36, mag-uuma, dunay kapuyo sa Barangay Mabini sa Malalag, nasikop alas 8:30 sa buntag, Huwebes, Septyembre 26.

Sumala ni Police Captain Edilberto Cabillo, hepe sa Malalag Municipal Police Station, nadakpan ang suspek pinaagi sa gahum sa warrant of arrest nga gipagawas sa Regional Trial Court Branch 4 nga gilagdaan ni Presiding Judge Dorothy Montejo-Gonzaga.

Kasong “rape with sexual assault” sa suspek nakadoket sa Criminal Case Number CRC-322-2015.

Tuig 2015 pa gipangita sa kapulisan ang suspek hangtud nga natultulan ang nahimutangan niini sa maong lugar.

Hinuon ang korte nitakda og piyansa nga P120 mil alang sa temporaryong kagawasan sa suspek. (Orlando B. Dinoy)