MAS giigmat ug nanganti ang Philippine Coast Guard (PCG)-Davao nga mopahigayon sila og dugang safety seminar alang sa mga bangkero ug motorized banca operators alang sa island hopping sa pantalan sa Sta. Ana, Davao City.

Kini ang gibutyag ni PCG-Davao Chief Lieutenant Commander George Maganto human nga miunlod ang Sam Christopher nga lantsa mga 150 metro gikan sa pantalan nga adunay sakay nga upat ka crew ug 45 ka mga pasahero padung sa Island Garden City of Samal (Igacos).

Sumala ni Maganto nga mituman man hinuon ang mga nanag-iya og mga pampasaheroan nga motorized banca sa ilang mga resikitos, apan mas maayong madugangan pa ang ilang mga pagbansay alang sa safety measures nga himuon ugaling mahitabo ug makalikay sa disgasya.

Dominggo, Mayo 19, alas otso sa buntag, dihang palarga na ang lantsa nga Sam Christopher natingala nalang ang kapitan nga si Terencio Pombo nga hinay-hinay nga miubos ang lantsa, ug didto ilang nasuta nga misulod na diay ang tubig ngadto sa nabuslot nga bahin sa lantsa kay nasangit sa pisi sa ilang pagbiya sa pantalan.

Imbes nga daghan pa unta og selfie ang mahitabo sa ka enjoy sa mag-island hopping, wala na sila ka picture kay naunlod na ang bangka.

Hinuon kay duol pa sa pantalan, gilayon nga naka aksyon ang PCG ug daling naluwas ang mga pasahero apil na ang mga crew niini.

Aminado ang kapitan sa maong lantsa nga wala niya makita ang maong pisi likod kun diinsila nidunggo.

"Wala gyod nako nakita, kay wala man pod gud nabutang nga buya, aron maghatag sa amo og sinyas nga adunay pisi pa diay, mao tong pag-atras namo, nasangit na diay sa ubos, wa pod namo nabantayan ug kalit kaayong nasudlan og tubig,” ingon ni Pombo.

Sa maong hitabo, ang Maritime National Authority o Marina miadto na usab sa lugar kinsa nagbuhat sa ilang kaugalingon nga imbestigasyon aron masayran ang tinuod nga nahitabo.