GITUGUTAN na ang mga batan-on nga nag-edad og 5-anyos pataas nga mogawas sa balay alang sa ilang outdoor activities human misugot ang Inter-Agency Task Force (IATF) subay sa Resolution No. 125, series of 2021.

Kini subay sa Executive Order No. 100 series of 2021 nga gipagawas ni Mati City Mayor Michelle Nakpil-Rabat sa niadtong Biyernes, October 8, 2021.

Gipaluag na sa Siyudad sa Mati ang ilang restrictions, apan kinahanglan nga may kuyog nga hamtong ug bakunado na ang mga nahisgutang mga edad.

Samtang gitugutan sab ang mga senior citizens nga mogawas, mosulod sa Mati City isip tourist ug returning residents kon bakunado na kini ug gikinahanglan magpakita sa ilang Covid-19 vaccination card.

Giklaro ngari nga bawal gihapon ang mga bata ug ang mga senior citizens sa indoors/outdoors buildings, facilities sama sa malls ug uban pang susamang establisemento.

Luyo sa gipaluagan nga restrictions, gikinahanglan gihapon ang pagsunod sa minimum public health standards sama sa paggamit og face mask, social distancing, paglikay sa mass gathering ug paghugas pirmi sa mga kamot gamit ang sabon ug tubig. (Jeepy P. Compio/CIO Mati)