STO. TOMAS, Davao del Norte -- Kasong parricide ang gipasaka batok sa amahan nga mikulata sa iyang anak nga misangko sa kamatayon sa Purok 7, Barangay Kimamon.

Ang suspek nga amahan mao si Gilbert Antonio Momo, 32, laborer, samtang ang anak niini si Junrey, 5-anyos.

Nasayran nga sa pag-uli sa amahan, iyang nakita ang anak nga nagdula og bugas diin nangakatag na kini sa salog.

Niadtong tungora, milakaw ang inahan sa bata hinungdan nga wala kini mabantayan dihang nagdula og bugas.

Sa kasuko sa amahan, iyang gipatiran ang iyang anak kinsa nahulog sa hagdanan.

Wala pa siya makuntento, iya pa kining giayo’g sumbag hangtud nga nanglagom ang bata ug wala na naglihok.

Gidali pagdala ang biktima sa Municipal Health Center, sa Barangay Tibal-og, Sto. Tomas, apan gideklara kining dead on arrival ni Dr Keeny Praise Celeste.

Human sa hitabo, daling mihimo og manhunt operation ang kapulisan sa Sto. Tomas Municipal Police Station, hinungdan nga nasikop ang suspek.

Kahinumdoman, sa Davao City namatay sab ang 3-anyos nga batang lalaki nga si Kean Gabriel human gisulod og sako sa iyang ginikanan ug gibunal-bunalan.

Tungod sa maong hitabo, gitukod sa Davao City Social Services and Development Office ang “Kean Gabriel” hotline nga 0908-818-4444, diin usa ka 24/7 hotline nga mamahimong i-report ang susamang pangabuso sa kabataan. (Jeepy P. Compio)