GITAHO sa Philippine Red Cross (PRC) nga dunay lima ka mga nagdonar og dugo nga tinun-an sa kolehiyo nga nasayrang positibo sa human immunodeficiency virus (HIV) ning tuiga, 2018.

Si Rizh Abellano, Davao City Aids Council (DCAC)-PRC building recruitment officer, nagsulti nga atol sa Ispeak media forum Huwebes, Nobyembre 29, nagkanayon nga ang kaso giduso na ngadto sa Alliance Against Aids (Alagad) in Mindanao alang sa pagpanambag ug medikasyon.

“One of the qualifications for blood donors are 18 and above so they are mostly college students already,” tin-aw ni Abellano.

Dugang pa niya nga nakig-alayon na sila sa mga nagpakabanang organisasyon sa mga kasong HIV apan di kini ginadasig kay ang uban magdonar lang og dugo sa tumong nga masayran ang ilang kahimtang sa HIV.

“Blood donation should not be a means of HIV testing because some people would want to donate blood to be tested of HIV,” pagklaro ni Abellano, ug nagkanayon nga ang tumong sa pagdonar og dugo mao ang pagsalbar og kinabuhi busa kadtong masayran nga positibo sa HIV iduso ngadto sa nagpakabana nga organisasyon.

“From the donors, we have to make sure that they do not have risky practices,” pasalig niya.

Samtang si Reproductive Health and Wellness Center (RHWC) head Jordana Ramiterre nag-esplikar nga ang PRC di direktang mohatag og resulta kay wala silay gahum sa paghimo niini.

“You cannot encourage na ang PRC ay maging testing center,” pagtin-aw ni Ramiterre.

Sumala niya nga ang taliabot nga 30th World Aids Day, ang publiko kinahanglan nga mahibawo sa ilang kahimtang pinaagi sa pag-test alang sa HIV infection sa mga gipiling mga centers ug di pinaagi sa blood donation ubos sa PRC.

Ang PRC nitala sab og 13 ka HIV positive nga mga indibiduwal niadtong 2017.