TACURONG CITY -- Moabot sa 50 ka priso sa Sultan Kudarat District Jail (SKDJ) ang natagaan og National Certificate (NC-2) human sila nakahuman sa programa sa Technical Education and Skills Development Authority (Tesda)-Soccsksargen.

Gibutyag ni Tesda-Soccsksargen director Rafael Abrogar nga gibansay sa ahensiya kadtong mga bilanggo nga duol na nga makagawas sa prisohan.

Tumong niini nga mapangandaman sa mga priso ang ilang paggawas sa SKDJ ug makapangita dayon sa trabaho.

Gibansay-bansay ang mga priso sa Tesda-Soccsksargen sa Carpentry ug food processing.

Natagaan sa NC-2 certification sa carpentry ang 25 ka mga lalaki nga priso samtang 25 sab ang babaye sa NC-2 sa food processing.

Giklaro ni Abrogar nga dili lamang sa mga bilanggo naghtag og Tesda training apan apil sa mga rebelde nga mibalik sa sabakan sa balaod, drug dependents, persons with disabilities, overseas Filipino workers ug uban pa.

Gidayeg sab sa pamilya sa mga priso ang inisyatibo sa Tesda-Soccsksargen alang sa ilang kaugmaon sa paggawas sa prisohan. (Edgar E. Fuerzas)