PERTENG lipaya sa mga residente sa Barangay Villarica sa Island Garden City of Samal (Igacos) human mibisita si Senador Christopher "Bong" Go kinsa midalit og mga grasya ngadto kanila.

Marso 27, 2022, mibisita ang senador sa Isla dala ang mga food packs, mga bitamina, face mask ingon man mga bisikleta, tablets ug sapatos nga alang sa mga residente.

Mikabat sa 500 ka mga indibiduwal ang nahatagan sa senador sa mga nahisgutang grasya diin giprayoridad niini ang mga solo parents, senior citizens, mangingisda ug mga drivers.

Gipasalamatan ni Sen. Go ang mga empleyado sa lokal nga kagamhanan sa siyudad nga andam sa kanunay nga motabang ug moserbisyo sa katawhan.

Sa ambush interview sa mga tigbalita ngadto sa senador atol sa proclamation rally sa Partido Demokratiko Pilipino–Lakas ng Bayan (PDP-Laban) sa Samal Island, Marso 27, 2022, siya nagpaabot sa iyang paningkamot sa senado alang sa kalamboan sa isla.

Sa iyang pamulong, iyang gipasigarbo nga naa sab siya'y mga kabanay sa maong isla ug gusto sab siya nga mopuyo sa nahisgutang isla.