NA-TRAP ug namatay ang unom ka mga indibidwal atol sa natigayong sunog kaadlawon niadtong Huwebes Santo, Abril 18, sa Purok 9-B, Adecor Compound, Barangay Poblacion, Maco, Compostela Valley Province.

Kini ang gikomperma ni Fire Inspector Cyrus Medina, chief sa Public Information Service sa Bureau of Fire Protection (BFP)-Davao, kinsa nagbutyag nga lakip sa unom ka biktima ang usa ka unom ka bulan nga batang babaye.

Ang mga biktima wala gipanganlan subay sa hangyo sa mga kabanay diin nag-edad og 56-anyos [babae]; 27-anyos [babaye]; 22-anyos [lalaki]; 18-anyos [lalaki]; 6 ka bulan [batang babaye], ug 20-anyos [lalaki].

Subay sa inisyal nga imbestigasyon sa kabomberohan, mga pasado alas 3 sa kaadlawon sa Huwebes Santo natigayon ang sunog nga paspas nga mikanit sa lawak sa gambalay sanglit gama lamang kini sa kahoy.

Giingong nalisdan na sa pagkanaog ang mga biktima pagawas sa ilang balay gumikan naka-grills kini, diin mismong sa hagdanan padulong sa ikaduhang andana nagsugod ang pag-ulbo sa kalayo butang nga wa na sila kagawas.

Sa kasamtangan, gipanghaya na ang mga biktima ug pagdayon ang gihimong imbestigasyon sa kapulisan ug kabomberohan labot sa maong hitabo.