GIPASAKAAN na og kasong murder sa Davao City Police Office (DCPO) pinaagi sa regular filing ang unom ka giingong mga suspek sa pagpusil-patay kang Barangay 9-A Captain Roderico "Tata" Llubit.

Mayo 25, 2021 gipusil si Llubit sud sa balay niini, diin niadtong Hulyo 3 pormal nga napasaka ang kaso batok sa unom ka mga suspek nga positibong gitudlo sa onse ka mga testigo sa krimen.

Sumala sa DCPO, upat sa unom ka mga suspek ang napasakaan na og kasong grave threats sa City Prosecutor's Office nga gitudlo sa mga witness.

Giingon nga ang upat mihulga sa kapitan tungod sa away sa yuta mga semana una natigayon ang krimen.

Sa kasamtangan, mas gipili pa sa kapulisan nga dili usa ipagawas ang ngalan sa mga suspek aron nga dali kining madakpan inig gawas sa warrant of arrest.

Dili pa gihapon madawat sa pamilya ni Llubit ang kamatayon sa kapitan nga miserbisyo og tinud-anay alang sa katawhan sa Barangay 9-A.