NAPATAY sa otoridad nga gipangunahan sa Philippine Drug Enforcement Agency (PDEA)-Davao uban ang Davao del Norte Police Provincial Office Provincial Intelligence Branch ug Tagum City Police Station ang usa ka 60 anyos nga lolo.

Gikasa sa PDEA-Davao ang buy-bust batok sa suspek nga si Alihul, alyas Ega, 60 anyos, didto sa Purok Masagana, Barangay Magugpo West, Tagum City, Davao del Norte, Abril 9, 2021.

Saysay sa PDEA nga atol sa operasyon, napugos sila sa pag-niyutralisa human alegasyong namusil ang suspek sa tropa.

Gidala pa ang suspek sa bay tambalanan apan gideklara kining dead on arrival.

Nakuha sa PDEA sa posisyon sa suspek ang mga pakite sa gituohang shabu nga dunay street value nga P45 mil, marked money ug .45 kalibre pistola nga dunay buhing bala.

Gipahiluna na sa mga kabanay ang patay nga lawas sa napatay. (Jeepy P. Compio)