COTABATO CITY -- Modawat og "separation pay" ang mga empleyado sa kanhi Autonomous Region in Muslim Mindanao (ARMM) kung mopailawom sila sa "phase out plan."

Puwede sab nga mokuha ang mapalagpot nga kawani og early retirement una matapos ang 2019.

Moabot og kapin unom ka libo nga mga kawani ang taktakon sa ilang trabaho apan moagi sila sa giingong phase out plan.

Ang phase out plan mao ang pagpailawom og seminar sa mga kawani aron ipahibawo kanila kon pila ang ilang madawat ug nganong taktakon sila. Ipahibawo sab kanila kon makabalik ba ang uban kanila sa trabaho o dili na.

Kini kabahin sa pagbalhin (transition) sa bag-ong namugna nga Bangsamoro Autonomous Region in muslim Mindanano (BARMM) nga gipangulohan ni Chief Minister Alhaj Murad Ibrahim.

Gipamahayag ni Local Government Minister Atty. Naguib Sinarimbo nga magbukas og bag-ong posisyon sa trabaho sa BARMM sa bulan sa Enero 2020.

Apan kinahanglan una nga iplastar ug ayuhon ang mga ahensiya sa BARMM sa ilang bag-ong estruktura.

Buksan ang sobra 400 ka mga bag-ong posisyon sunod tuig sa gusto nga motrabaho sa BARMM. (Edgar E. Fuerzas)