DIGOS CITY -- Mokabat sa 6,000 ka mga molupyo ug mga silingang dapit sa dakbayan ang miapil pagkaon sa “eat all you can” nga litson atol sa ika-19 nga Araw ng Digos City niadtong Dominggo, Septiyembre 8.

Kini sab ang pinakaunang higayon nga mitanyag ang lokal nga gobyerno og libreng pakaon sa mga litson atol sa kulminasyon sa usa ka semanang selebrasyon nga gisugdan niadtong Septyembre 2.

Aduna’y 6 mil ka mga tiket ang gipang-apud-apod ngadto sa publiko diin ilang gipakita aron makaapil sa pagkaon.

Gibahin-bahin sa upat ka hugna ang pagpakaon gikan alas 11 sa buntag hangtud ala 1 sa hapon.

Samtang sa tradisyonal nga “Lechonan sa Kadalanan”, mokabat sa 800 ka mga baboy ang gituyok sa dalang Magsaysay diin dinhi namalit ang uban nga wa makaapil sa “eat all you can”.

Sa parada, miabot sa 10,000 ka mga tawo gikan sa lokal ug nasyonal nga ahensiya sa gobyerno ang miapil nianang pagkabuntag.

Sa kinatibuk-an, gideklara sa Digos City Police Office nga hapsay ug malinawon ang pagsaulog sa kasumaran sa dakbayan luyo sa mga hulga sa terorismo. (Orlando B. Dinoy)