COTABATO CITY -- Misaka na sa ngadto sa pito ka mga kaso sa sakit nga polio ang natala sa probinsiya sa Maguindanao.

Kini mismo ang gikompirma ni Integrated Provincial Health Office (Ipho-Maguindanao) Elizabeth Samama.

Ang pito nga nagka-polio nagagikan sa mga lungsod sa Shariff Saydona Mustapha, Rajah Buayan, Datu Piang, Datu Hofer, Datu Odin Sinsuat, Datu Abdullah Sangki ug Datu Anggal Midtimbang sa nahisgutang probinsiya.

Gitutukan sa Ipho-Maguindanao ang pag-atiman sa pito ka poliomyelitis patients nga nagpangedaron gikan walo ka bulan hangtud upat ka tuig.

Niadtong 2019, nakatala og duha ka kaso sa polio ang Maguindanao nga sakop sa Bangsamoro Autonomous Region in Muslim Mindanao.

Ang pito nga mga bag-ong kaso sa polio sa Maguindanao nahibal-an lang karong bulan sa Enero 2020.

Palaparon pa sa Ipho-Maguindanao ang round 3 sa Sabayang Patak Kontra Polio nga nagsugod kagahapon, Enero 20, hangtud Pebrero 2 aron mapungan ang pagtaas sa ihap sa mga magkasakit niini. (Edgar E. Fuerzas)