KIDAPAWAN CITY -- Grupo sa New People's Army (NPA) ang gitudlo nga maoy mipatay sa senior citizen nga lalaki alas 5:27 sa hapon niadtong Miyerkules.

Giila ang biktima nga si Silvestre Sumaya, 71, minyo, panday ug molupyo sa Purok Durian, Barangay New Bulatukan, Makilala, North Cotabato.

Gibutyag ni North Cotabato Police Provincial Office Director Colonel Henry Villar nga naglingkod lamang ang biktima sa purok duol sa ilang balay niadtong higayona.

Apan kalit lang giduol sa upat ka wala mailhing tawo ug gisinggitan og "traydor sa kalihukan," dungan pusil gamit ang kalibre .45 nga pistola tumong sa ulo ug dughan.

Abtik sab nga misibat ang mga mamumuno sakay sa duha ka motorsiklo paingon sa bukirong bahin sa Bansalan, Davao del Sur.

Gitumbok nga ang biktima usa ka kanhi miyembro sa NPA apan dugay na nga misurender ngadto sa mga awtoridad ug nagbag-o na sa kinabuhi. (Edgar E. Fuerzas)