BANSALAN, Davao del Sur -- Nasapon sa mga sakop sa Bansalan Municipal Police Station ang lalaking nalista nga number 2 most wanted sa lungsod gumikan sa kasong pagpangabuso adlaw’ng Lunes, Abril 12, 2021.

Si Major Peter Glenn Ipong, station commander sa kapulisan, nag-ila sa dinakpan nga mao si Verly Orge Florentino, 72 anyos, ulitawo ug molupyo sa Purok 3, Barangay Dolo, sa samang dapit.

Matod ni Ipong nga alas 11:45 sa buntag nasikop ang suspek kinsa gireklamo sa kasong paglapas sa Seksyon 5(B) sa Republic Act 7610, kun Acts of Lasciviousness.

Giingong nga gireklamo ang maong lolo sa pagpanghimas niini sa pribadong parte sa lawas sa babayeng bagets nga ilang silingan.

Nasayran nga gipaguwa sa Regional Trial Court sa Bansalan-Magsaysay ang orden de aresto nga gilagdaan ni Presiding Judge Carfelita Cadiente-Flores.

Sa kasamtangan, nabilanggo na sa selda sa kapulisan ang dinakpan apan, mahimong makaangkon sa temporaryong kagawasan ugaling makapyansa sa korte sa kantidad P180,000.

Wa pa’y gipaguwang commitment order ang korte samtang gi-proseso sa kapolisan ang disposisyon sa maong kaso. (Orlando B. Dinoy)