NAKABSAN sa kinabuhi ang 8-anyos nga lalaki human mahulog sa sapa alas 3:30 sa hapon, Martes, Abril 20, 2021, didto sa Purok 3, Barangay Palma Perez, M'lang, North Cotabato.

Giila ang biktima nga si Jake Faldas, nagpuyo sa nahisgutang lugar.

Matud ni M'lang Chief of Police Lieutenant Colonel Realan Mamon nga nanguha og kuol ang biktima apan aksidente nga nahulog sa sapa duol lamang sa ilang balay.

Sa pagkahulog niini, napantok ang ulo sa bata sa bato ug gianod sa baha.

Dali siyang gitabang sa mga silingan ug gihatud ngadto sa M'lang District Hospital apan namatay gihapon siya human makaangkon og samad sa ulo ug bun-og sa lawas ug nakainom pa gyud og tubig sa sapa.

Tungod niini, nagpasidaan si Mamon sa mga molupyo kilid sa sapa nga bantayan ang ilang mga anak ilabi na kadtong mga menor de edad. (Edgar E. Fuerzas)