STA. MARIA, Davao Occidental -- Sa 22 ka bag-ong kaso sa Delta variant sa Covid-19 sa Davao Region, siyam niini gikan sa Sta. Maria sa Davao Occidental.

Base sa profile sa mga na-infect sa Delta variant, naay 10-anyos hangtud 40-anyos kinsa naka-recover ug na-discharged na ug gikatakdang i-reswab na sab.

Sumala sa Department of Health (DOH)-Davao nga ang mga bag-ong kaso gikan sa mga specimens niadtong Hulyo 29, Agosto 5 ug Agosto 12 nga gipasa ngadto sa Philippine Genome Center alang sa whole genome sequencing niini.

Miabot na sa 300 ang aktibong kaso sa Sta. Maria ug 800 na ang kinatibuk-ang kaso sa Covid-19 sukad ang pandemya.

Ang lungsod karon naka-enhanced community quarantine (ECQ) hangtud Agosto 31.

Gipaningkamutan ni Sta. Maria Mayor Josephine Mariscal nga matubag ang nag unang panginahanglanon sa mga residente samtang gipaubos ang tibuok munisipalidad sa ECQ.