GIPANGGUBA sa militar ang daghang mga nagkadaiyang armas ug eksplosibo nga ilang narekober pinaagi sa pagpaligis niini og pison alas 2:00 sa hapon Huwebes, Oktubre 28, didto sa Datu Odin Sinsuat, Maguindanao.

Mga armas nga gipaligsan og pison gilangkuban sa 86 ka high-powered firearms, 94 low-powered loose firearms, 779 assorted firearms, 291 anti-personnel mines ug mga improvised explosive devices (IEDs).

Kini dungan sa kasaulogan sa 345h Founding Anniversary sa 6th Infantry (Kampilan) Division, Philippine Army nga gipangulohan ni Major/General Juvymax Uy.

Mitambong sa kalihukan mao si Army Chief Lieutenant General Andres Centino. Ang kalihukan gipahigayon sa 6th ID Headquarters sa Camp General Gonzalo Siongco, Barangay Awang, sa nahisgutang lungsod.

Nanguna sab sila si Centino ug Uy sa ceremonial demilitarization sa mga armas nga uban kanila nailog gikan sa mga kaaway o kaha nakompiska ug gisurender ngadto sa militar. Tumong niini aron nga mga armas di na magamit o subling mapahimuslan sa di awtorisadong mga indibiduwal.

Ang uban sa mga armas nga nailog o kaha nakompiska ug gisurender nagagikan sa probinsiya sa Maguindanao, North Cotabato, Sultan Kudarat, South Cotabato, Sarangani, Lanao del Sur, lakip na sa mga siyudad sa Cotabato, Kidapawan, Tacurong, Koronadal ug General Santos.

Gipasalig ni Centino nga palig-unon pa sa 6th ID ang operasyon batokloose firearms sa Central Mindanao.