ANAA sa 98 porsiyento sa kapulisan sa Police Regional Office (PRO) sa Davao Region ang andam na magpabakuna human miabot sa Davao City ang Sinovac nga gidonar sa nasud China sa Pilipinas.

Sa usa ka press briefing, gibutyag ni PRO-Davao spokeswoman Police Major Eudisan Gultiano nga andam ang anaa sa 98 percent sa ilang hanay nga moihap sa mokabat kapin kun kulang otso mil ngadto na sa nuybe mil ka mga personahe.

Ang nahibilin nga dos porsiyento mao kadtong mga pulis nga nagduha-duha gumikan sa ilang tinuohan sa relihiyon.

Dugang sa opisyal nga subay sa ilang gihimo nga survey sa ilang hanay, misalig sa bakuna nga naaprobahan sa Bureau of Food and Drug.

Usa ang Sinovac nga bakuna ang unang miabot sa Davao City nga maoy unang ibakuna sa mga frontliners nga gilangkuban sa mga doctors, nurses, mga kapulisan ug kasundalohan.

Usa ang kapulisan sa mga prayoridad nga mabakunahan diin karong adlawa, Marso 5, magsugod ang pamakuna sa Davao City. (Jeepy P. Compio)