ANTIPAS, North Cotabato -- Tadtad sa bala nga nakaplagan ang administrative assistant sa Department of Education Cotabato Division alas 7:20 sa gabii, Miyerkules, Mayo 22.

Ang biktima giila nga si John Rex Eremedio Daruca, 30, ulitawo, nagpuyo sa Barangay Malinan, Kidapawan City.

Sa taho gikan sa Antipas Municipal Police Station, nasayran nga nasiplatan sa mga molupyo ang patay nga lawas sa biktima nga nagbuy-od daplin sa kalsada sa Purok 2, Barangay Pontevedra, Antipas.

Sa diha nga nagresponde ang mga pulis nga gitawagan sa mga barangay opisyal, nasayran nga lawas sa biktima tadtad sa mga bala ug naligo sa kaugalingong dugo.

Nahanaw sab ang motorsiklo nga gimaneho sa biktima nga bag-o pa niya gipalit.

Sa wala pa nakaplagan ang patay nga lawas ni Daruca, duna matud pay mga molupyo ang nakadungog og buto-buto sa armas.

Gikanayon sa pamilya nga nananghid ang biktima nga moadto sa Antipas, kauban ang iyang barkada aron bisitahon ang ila sab nga kaila.

Apan sukad niadtong higayona, wala na makauli ang biktima.

Ang hitabo padayon pang giimbestigahan sa kapulisan sa Antipas MPS. (Edgar E. Fuerzas)