KIDAPAWAN CITY -- Nabugtuan sa iyang kinabuhi ang usa ka edaran human dunggaba sa iyang trahabante alas kwatro sa hapon niadtong adlaw nga Sabado sa siyudad sa Kidapawan.

Giila ang namatay nga si Carlos Collado Sr, 80-anyos kinsa minyo ug nagpuyo sa Purok 5, Barangay Balindog.

Gibutyag ni Kidapawan City Chief of Police, Lieutenant Colonel Ramel Hojilla nga nakaplagan ang biktima sulod sa iyang balay nga naligo sa iyang kaugalingong dugo ug wala nay kinabuhi kinsa naka-angkon og walo ka samad dinunggaban.

Gitudlo nga suspek mao ang iyang trahabante nga si Ritchie Cajucom Alfuerto nga gipahawa sa biktima gumikan kay nangawat sa iyang balay.

Sigon sa mga testigo nga hubog nga misulod si Alfuerto sa balay sa iyang agalon ug didto iya kining giluba gamit ang kutsilyo sa makawalo nga higayon nga maoy hinungdan sa kamatayon niini.

Nakit-an sab sa silingan sa biktima nga abtik nga miikyas ang suspek pagawas sa balay ni Collado kinsa nagkadugo ang sanina.

Sa kasamtangan padayon nga gipangita sa kapulisan si Alfuerto ug gitakda nga pasakaan sa kasong pagpatay.