KIDAPAWAN CITY -- Milihok na ang lokal nga panggamhanan sa Alamada sa North Cotabato aron nga matunolan og mga hinabang ang mga naapektuhan sa mga pagbaha ug pagdahili sa yuta tungod sa padayong pagdaut sa lakat sa panahon.

Natabonan ang dakong bahin sa kalsada sa Sitio Upper Bao, Barangay Bao, Alamada sa dihang midahili ang bahin sa bukid niadtong Huwebes sa buntag, Agosto 6.

Kini mismo ang gikompirma ni Alamada Mayor Jesus "Susing" Sacdalan kon diin nakulgot ang mga sakyanan ug dili makagawas ang mga produkto gikan sa kaumahan nga itumod sa lungsod.

Natigayon sab ang mga pagdahili sa yuta sa Sitio Tinago, Sitio Busay, Sitio Tumindok ug Sitio Mahayahay nga sakop sa Barangay Paruayan sa nahisgutang lungsod.

Gawas sa landslide, gibaha sab ang Sitio Campo Uno sa Barangay Paruayan, Sitio Manglicmot ug Sitio Dry Creek sa Barangay Camansi, Purok 1 ug Purok 2 sa Barangay Mirasol, Purok 3,4,6 lakip na ang PNP Village sa Barangay Kitacubong nga pulos sakop sa Alamada.

Mga naapektuhan sa kalamidad, anaa karon temporaryong nanimuyo sa mga luwas nga dapit ilabi na sa mga tulunghaan ug sa mga barangay hall. (Edgar E. Fuerzas)