COTABATO CITY -- Nanakod ang usa ka Covid-19 patient sa iyang tulo ka igsoon nga migawas sa isolation room sa probinsya sa Maguindanao niadtong miaging adlaw.

Gusto ni Ministry of Health (MOH-Barmm) Minister Safrullah Dipatuan nga ma-imbestigahan ang paggawas sa estudyante sa isolation room sa Maguindanao Provincial Hospital.

Mi-uli ang ulitawo sa ilang balay sa Shariff Aguak Maguindanao ug mihangop sa iyang pamilya.

Matud ni Minister Dipatuan nga anak sa usa ka municipal councilor sa Shariff Aguak Maguindanao ang estudyante.

Mi-apela si Dipatuan sa katawhan sa Maguindanao ilabina kadtong mga lokal opisyal nga dili gamiton ang ilang impluwensiya sa kaugalingon niining interes.

Gumikan sa paggawas sa estudyante sa isolation room iyang gitakdan ang tulo niya ka igsoon nga nag-edad 13 anyos, 14, ug 18 nga karon nagpositibo sab sa Covid-19.

Ang ulitawo apil sa 12 ka estudyante nga nagpositibo sa Covid-19 nga gikan sa Cebu nga mi-uli sa Maguindanao.

Gitahasan ni Dipatuan ang mga nagdumala sa mga isolation facility sa Barmm nga hugtanon nga ipatuman ang mga sumbanan batok sa Covid-19. (Edgar Fuerzas)