ANAA na sa luwas nga kahimtang ang usa ka baby boy kinsa naa karon sa pagdumala sa Municipal Social Welfare and Development Office (MSWDO) human maluwas sa mga residente sa Barangay San Roque, Digos City sa Davao del Sur niadtong Lunes sa gabii, Agosto 30, 2021 dihang gibilin lang kini sa usa ka inahan sa gawas sa usa ka balay.

Una niini, perteng kurata sa mga residente dihang ilang nakita ang bata nga gibalot og lampin ug nagkadugo pa gawas sa usa ka balay sa San Roque.

Gilayong gipahibalo sa mga residente ang barangay ug ang kapulisan hinungdan nga gilayong miabot ang mga social workers ug giluwas ang masuso.

Gidala sab dayon sa ospital ang bata aron ipahiling ang kahimtang niini sa panglawas kinsa anaa kini sa maayong kahimtang.

Ang bata anaa sa kustodiya sa MSWDO samtang naghimo og makuti nga imbestigasyon ug pagpanubay ang kapulisan sa Digos aron maila ang inahan nga mibiya sa iyang anak.