KIDAPAWAN CITY -- Aprubado na sa Regional Inter-Agency Task Force on Covid-19 ang resolution sa Land Transportation Office (LTO)-Soccsksargen nga tugutan ang backriding sa mga motorsiklo.

Sumala kang LTO Regional Director Macario Gonzaga nga ang maong resolution ang kinahanglan pa nga isumite alang sa pag-aproba sa National Inter-Agency Task Force.

Dugang ni Gonzaga nga kini isip tubag sa hangyo sa katawhan sa Soccsksargen nga tugutan ang angkas sa motorsiklo ilabina kadtong sa mga hilit nga dapit.

Mi-apela sab si Gonzaga og suporta sa mga local government unit sa rehiyon.

Kinahanglan sab nga mohimo ang mga LGU og susama nga resolution aron lig-on ang ilang hangyo sa IATF.

Apan dunay mga LGU na sa Soccsksargen ang gitugutan ang angkas sa motor apan kadtong mga asawa ug mga anak lamang.

Giklaro ni Gonzaga nga kung aprobahan sa IATF ang ilang hangyo, kinahanglan sab nga magbutang og babag ang mga drayber sa ilang motor sa mga angkas niini aron masiguro nga malikayan ang makatakod nga Covid-19. (Edgar Fuerzas)