ANG lokal nga panggamhanan sa Tagum City ubos sa pamunoan ni Mayor Rey T. Uy pinaagi sa opisina sa City Veterinary ug City-Wide Free Rabies Vaccination nagpahigayon og libreng bakuna kontra rabies.

Gibutyag pinaagi sa opisyal nga Facebook page sa City Government of Tagum nga ang maong kalihukan gipahigayon sulod sa tulo ka adlaw nga nagsugod adlaw’ng Martes, Disyembre 20, 2022 ug mahuman karong adlawa, Huwebes, Disyembre 22.

Gipangbakunahan ang mga binuhing iring ug iro gikan sa nagkalain-laing dapit sa siyudad.

Nasayran nga niadtong adlaw’ng Martes ang pagpamakuna didto gipahigayon sa Purok Uraya, Garciaville, Barangay Mankilam gikan sa alas 9 sa buntag hangtod sa alas 12 sa udto ug pagka-ala una sa hapon hangtod sa alas 4 sa hapon didto kini gipahigayon sa Purok 2-A ug Purok 8-A sa Barangay San Miguel.

Adlaw’ng Miyerkules , didto sa Gymnasium sa Barangay New Balanban gikan sa alas 9 sa buntag hangtod sa alas 12 sa udto ug ala 1 sa hapon hangtod sa alas 4 sa hapon didto kini sa Barangay La Filipina.

Ug Huwebes, Disyembre 22, 2022 didto ipahitabo sa Gymnasium sa BarangayVisayan Village gikan sa alas 9 sa buntag hangtod sa alas 12 sa udto ug pagkahapon gikan sa ala una sa udto hangtod sa alas 4 sa hapon didto sa Gymnasium sa Barangay Apokon.

Giawhag ang mga buot magpabakuna sa ilang mga iring ug iro sa Huwebes nga mobisita sa pinakaduol nga vaccination site.