NASAKPAN sa bana ang iyang asawa nga dunay kulokadidang sa dihang natahap kay kanunay nang baga og lipstick ug seksi na kaayo.

Kini human nga iyang gisundan alas 9 sa gabii niadtong Martes, Septiyembre 3, sa Kilometro 5, Guadalupe, Barangay Matina Crossing, Talomo District, Davao City.

Grabeng tiyabaw sa bana sa San Pedro Police Station nga si Erwin (bansagon gitago), 38-anyos, samtang nagsaysay nga ang iyang asawa tua sa sud sa Room 10 sa usa ka lodging inn sa Barangay 39-D, Trading Boulevard ning siyudad.

Una niini, gisundan sa bana ang iyang asawa nga si Mirasol, 32-anyos, kay natahap gumikan baga kaayo kini og lipstick, puok og short pants ug nagsul-ob og spaghetti strap dress.

Apan nisiga ang mata sa bana dihang pag-abot niya gawas sa lodging inn, nakita niyang gisugat ang iyang asawa og usa ka macho nga lalaki, dayon nanulod sila sa Room 10.

Wala mag-usik og oras ang bana ug nagpatabang sa San Pedro PNP, ug sakay sa Mobile Patrol 89, giadtoan nila ang kuwartro ug gituktok.

Didto nakit-an gyud sa bana nga wala nay sanina ang iyang asawa, kauban si alyas Roger, 41-anyos, construction worker, taga Punta Dumalag nga hubo usab.

Tungod sa hitabo, gipangdampot ug gipriso sa San Pedro PNP ang mga nahisgutan kinsa pasakaan og kaso sa bana.