STA. CRUZ, Davao del Sur -- Kasong pagsupak sa Republic Act 9165, kun Comprehensive Dangerous Drug Act of 2002, ang ipasaka batok sa babayeng pusher nga nasikop sa Sitio Patulangon, Barangay Zone I.

Ang suspek mao si alyas Marie, kinsa nakuhaan sa iyang posisyon og mga pakite sa gituohang shabu, cellphone ug marked money.

Depensa sa suspek nga usa ka 47-anyos nga buhi-buhi lamang kuno ang iyaha gumikan sa kapit-os sa panahon.

Bisan pa man niini, giposasan kini sa awtoridad kinsa maoy milusad sa buy-bust operation.

Nasayran nga usa ka job order nga trabahante sa kagamhanang probinsiyal sa Davao del Sur ug taga Barangay Coronon ang suspek nga naila isip high-value individual ug ang ngalan anaa sa DI watchlist.

Motimbang sa 14.64 gramos nga dunay standard market value P219,600 mil ang shabu nga nakuha sa iyang posisyon.

Gibalhog na ang suspek samtang naghulat sa sunod mando sa korte labot sa iyang kaso nga napasaka kagahapon, Agosto 2, 2021. (Jeepy P. Compio)