PIKIT, North Cotabato -- Padayon pang gisusi sa kapulisan sa Pikit Municipal Police Station ang nahitabong pagpaarak og bala sa armadong mga lalaki sa usa ka balay sa Barangay Poblacion sa lungsod.

Nahitabo ang pagpaarak alas 9:45 sa gabii, Huwebes, Agosto 15, kon diin napatay si Steve Mark Delamide, 27, samtang samaran ang iyang igsuon nga si Jake, 25, pulos mag-uuma ug molupyo sa Sitio Pogpog sa maong barangay.

Nasayran gikan kang Pikit chief of police Captain Mautin Pangandigan nga nangatulog na ang mga biktima sulod sa ilang balay sa dihang niabot ang mga armadong lalaki ug gipaulanan sila og mga bala gamit ang M16 Armalite rifles.

Daling nisibat ang mga armado human nakatimaho nga nagsingabot na ang mga sundalo ug pulis sa dapit.

Nakahiagom og daghang samad sa lawas si Steve Mark hinungdan sa iyang kamatayon samtang ang iyang igsuon gihatud ngadto sa Medical Hospital sa Pikit.

Gituohan nga personal nga atraso ang gilantaw nga motibo sa hitabo gumikan kay sa wala pa ang insidente dunay, matud pay nakaaway ang mga magsuon sa ilang dapit.