GIHUYOP sa kusog nga hangin dungan sa ulan ang Barangay Libo-o, M'lang, North Cotabato alas 3:30 sa hapon, Miyerkules, Septiyembre 22, 2021.

Sa taho gikan sa Provincial Disaster Risk Reduction and Management Office (PDRRMO-Cotabato), nasayran nga usa ka balay sa pamilyang Necesito ang natumbahan og punoan sa kahoy.

Suwerte na lang nga walay naangol sa pamilyang Necesito gumikan walay tawo ang ilang balay niadtong orasa.

Daghan sab nga mga pananum ang gilarot sa kusog nga hangin nga gihulagway sa mga molupyo nga mora og buhawi.

Kahinumdoman nga niadtong miaging semana, giigo og buhawi ang tulo ka sitio sa Kabacan, lakip na sa Carmen, diin daghang balay ang nangaguba ug usa ka tawo naangol.

Gialerto sab sa PDRRMO ang mga namuyo daplin sa sapa ug kabukiran sa posibleng bul-og sa baha ug pagdahili sa yuta. (Edgar E. Fuerzas)