GISUGDAN kagahapon ug karong adlawa ang "deboning" kun pagtanggal sa unod gikan sa bukog sa dakong balyena nga napalgang patay sa baybayon sa Sitio Sakalig, Barangay Sugal, Jose Abad Santos, Davao Occidental niadtong Sabado.

Ang D' Bone Collector Museum nga gipanag-iyahan sa American bone collector Darrell Dean Blatchley ang gikatahong maoy motanggal sa unod aron magpabilin ang bukog nga ibutang sa museum niini sa Davao City.

Subay sa pamahayag sa Department of Environment and Natural Resources (DENR) pinaagi sa ilang official Facebook page nga duha ka mga mananagat ang nakakaplag sa dakong sperm whale.

Dugang pa nga dunay gitas-on nga 60 ka tiil ug siyam ka tiil ang gilapdon diin dunay daghang samad sa kalawasan nga gituohang patay na nga napadpad sa baybayon sa Sitio Sakalig.

"With a measurement of 60 feet in length and 9 feet in width, the carcass of the said sperm whale was observed to have multiple wounds. It was also said that most likely, it was already lifeless when it reached the shores of Sitio Sakalig," giingon sa DENR.

Una niini, si DENR-Davao Executive Director Bagani Fidel Evasco mimando sa Provincial Environment and Natural Resources Office Davao Occidental nga makig-koordinar sa marine biology experts.

“There is also a need to cordon the area. And the carcass should be disposed immediately because its smell can be toxic and hazardous to the community,” sumpay sa pamahayag sa DENR.

Kagahapon ug karong adlawa ang gitakdang "deboning" pinaagi sa D' Bone Collector Museum nga gisaksihan sa Provincial ug Municipal Disaster Risk Reduction Management Office.