NABUNTURAN, Compostela Valley Province - Nagpadayon ang gihimong imbestigasyon sa kapulisan sa Nabunturan Municipal Police Station sa natigayong disgrasya Lunes sa hapon, Pebrero 4, tali duha ka mga bus didto sa Kilometro 91.

Sa inisyal nga report gikan sa Philippine Information Agency (PIA) Compostela Valley, alas 2 sa hapon padayong mi-rescue ang mga responders sa dapit diin suma sa Bureau of Fire and Protection (BFP-ComVal) dunay mga dead on the spot sa maong disgrasya.

Sa Facebook sa netizen nga si Divine Grace Muñoz Ampo iyang gipakita pinaagi sa pag-video ang pag-rescue sa mga biktima gikan sa Bachelor Tours ug sa Davao Metro Shuttle.

Makita nga gipangdayungan sa mga responders ang mga biktima padung sa ilang ambulansya ug gipangdala sa pinakaduol nga ospital gikan sa pagpasad sa mga samaron ug mga dead on the spot sa kalsada.

Sugad sa pagsuwat ning maong balita, wala pa masayri pila kabuok ang namatay ug ang mga samaron, apan gibana-bana subay sa sketchy report sa otoridad, 5 ang dead on the spot, ug mokabat 15 ang samaron.

Nasayran nga ang Bachelor padung sa Davao City samtang ang Metro Shuttle padung sa New Bataan, ComVal.

Sa inisyal nga imbestigasyon sa otoridad, wa na mabawi sa matag-usa ka drayber ang manubela gumikan sa kadangog sa kalsada dala sa pagbunok sa ulan sa dapit.

Ang kapulisan padayong naghimo og makuting imbestigasyon sa hitabo aron masayran kinsa ang mapanubag sa maong disgrasya.

Gisulayan og kuha sa SuperBalita ang kabahin sa Davao Metro Shuttle Bus ug sa Bachelor Tours, apan wala una sila mihatag og pamahayag sanglit naghulat pa sila sa imbestigasyon sa otoridad.

Hinuon, andam ang duha ka kompanya nga motubag sa galastuhan sa mga biktima sa maong bangga.