NAKABSAN dayon sa kinabuhi ang usa ka helper sa trak sa natigayong disgrasya alas 2:10 sa hapon niadtong Miyerkules sa Sitio Bugac, Barangay Suawan, Marilog District, Davao City.

Sa impormasyon gikan kang Police Captain Philip Dave Uddin, hepe sa Marilog Police Station, nasayran nga upat ka mga sakyanan ang nalambigit sa bangga nga miresulta sa pagkamatay sa biktima nga si Rayan Postrano Cabaniero, 29 anyos, taga Toril, Davao City.

Sa inisyal nga imbestigasyon sa traffic section sa Marilog police, nasayran nga nagdagan sa samang direksiyon pa-Davao City gikan Bukidnon area ang upat ka mga sakyanan dihang pag-abot sa dapit, nawad-an og preno ang usa ka forward truck ug nangabangga sab ang kadikit niini nga behikulo.

Sa kakusog sa impak sa pagkabangga sa upat sa sakyanan, naipit ang helper sa trak, hinungdan nga namatay kini.

Gikustodiya na sa Marilog police ang drayber nga posibleng mag-atubang og kasong reckless imprudence, resulting in homicide and damage to property. (Jeepy P. Compio)