DIGOS CITY -- Daw “ghost town” na ang usa ka barangay sa dakbayan sanglit maihap na ang namuyo sa lugar human pugsanong gipabakwit sa lokal nga gobyerno tungod kay delikado na ang ilang lugar.

Dili na mapuslan sa mga molupyo sa Sitio Bandera, Barangay Balabag ang ilang mga balay kay nangatumpag mao nga naguba ang kisame ug nangaliki ang mga bungbong.

Adunay pipila ka pamilya ang mibalik aron manghipos sa mga gamit nga mapuslan pa ug ang uban nahibilin ang ilang mga binuhing hayop.

Dakong suliran sab kang Evangeline Ipil kung asa na sila mopuyo human gideklara sa Philippine Institute of Volcanology and Seismology (Phivolcs) nga “no habitation” na ang ilang lugar.

Nanawagan sila karon sa lokal nga gobyerno nga pangitaan og relocation site kay di na nila maaguwanta ang pagpuyo sa evacuation centers.

Mitiyabaw na ang mga bakwit sanglit gawas nga nawad-an og balay, wa na sab silay panginabuhian.

Samtang padayon nga gi-suspende sa lokal nga gobyerno ang klase sa mga tinun-an sa mga tunghaan.

Sa Digos City National High School, gikurdon ang tunghaan human nangabuak ang bungbong ug ubang istruktura nga two-story school building ug padayon ang ginapahigayong assessment.

Apan gilauman nga mobalik na ang klase sunod semana. (Orlando B. Dinoy)