TACURONG CITY -- Gikunis-kunis ang lawas sa usa ka masuso o bag-ong panganak nga bata human gikaon sa baboy alas 2:00 sa hapon, Martes, Hunyo 22, 2021, sa lungsod sa President Quirino, probinsiya sa Sultan Kudarat.

Gibutyag ni President Quirino Sultan Kudarat Chief of Police Captain Robert Trinidad nga gitaho sa ilang buhatan ni alyas Lucy nga molupyo sa Purok 3, Barangay Banali sa nakita nga patay nga lawas sa bata.

Giingong gilabay ang masuso duol sa binuhing baboy ni Lucy nga gihigot sa punoan sa saging.

Giputol-putol ug gikunis-kunis sa baboy ang patay nga lawas sa bata.

Apan giingong walay nadungog nga hilak sa bata ang mga molupyo sa maong dapit.

Dako ang pagtuo ni Trinidad nga posibleng patay na ang bata nga gilabay duol sa hinigot nga baboy.

Gipangita na sa mga opisyal sa barangay ang inahan nga naglabay sa iyang bag-ong panganak nga bata.