HALOS di mahitsura ang usa ka bata samtang laing usa ang naangol atol sa pagbusikad sa granada didto sa Purok 6 Boongon, Barangay Rizal, Malalag, Davao del Sur alas 11 sa buntag, Huwebes, Hulyo 7, 2022.

Giila sa Police Regional Office (PRO) Davao ang mga biktima nga magsuong Christian Jay Gecale Gaspar, 7-anyos, Grade 1 pupil, ug si Kent Gecale Gaspar, 5-anyos pulos lumolupyo sa Purok 6 Boongon, Barangay Rizal sa maong lungsod.

Base sa imbestigasyon sa Malalag Municipal Police Station, gidulaan sa magsuon ang granada human nila kini nakita samtang nagdula gawas sa ilang balay.

Giingon nga kalit na lang nadunggan sa lugar ang buto tungod sa pagbusikad sa granada.

Sa hitabo, dead on the spot si Christian Jay, samtang ang iyang igsuon nga si Kent, gidala ngadto sa Davao del Sur Provincial Hospital, Digos City sa mga personnel sa Municipal Disaster Risk Reduction and Management Center-Malalag aron matambalan.

Tumang pagbangotan karon sa ginikanan sa mga nahisgutan, diin padayon ang gihimong imbestigasyon sa Malalag MPS aron masayran asa gikan ug kinsay tag-iya sa granada.