SIKOP sa kapulisan sa Sta. Ana Police Station ang usa ka 23-anyos nga lalaki kinsa gituohang suspek sa paglugos ug pagdunggab sa 14-anyos nga babaye Dominggo sa gabii, Marso 24, sa Barangay Lapu-Lapu, Agdao District, Davao City.

Sa impormasyon gikan sa kapulisan sa Sta. Ana, ang suspek mao si Michael (bansagon gitago), ulitawo, walay trabaho ug nagpuyo sa Barangay Ubalde, ning siyudad.

Subay sa nahinabi sa SuperBalita sa usa ka wa nagpaila nga silingan sa biktima, alegasyong nanguyab ang suspek ngadto sa 14-anyos, apan wala kini gisugot sa dalagita gumikan sa giingong hitsura sa suspek nga di masaligan, kulot og buhok, ug bati kaayo’g nawong.

Dihang nasayran sa suspek nga wa siya sugta sa dalagita, iya kining gidala sa usa ka giabandona nga balay sa Brgy. Lapu-Lapu ug giingong gimolestiya ug dihang milampos na kini, iyaha kining gidunggab.

Nianang mga higayona, ang pagpangayo og pakitabang sa biktima nadunggan sa silingan hinungdan nga nabuhian kini sa suspek ug gidali pagdala sa duol nga tambalanan ang dalagita sa tabang sa mga silingan.

Pipila ka oras sa tabang sa mga residente ug mga opisyal sa barangay, nasikop ang suspek kinsa nakulatahan pa sa mga istambay nga nasayod sa hitabo.

Niining kasamtangan, gibalhog na sa selda sa Sta. Ana PNP ang suspek samtang ang biktima padayong nagpaalim sa samad nga nahiagoman.

Wala pa sab migula ang medico legal sa gihimong eksaminasyon ngadto sa biktima.

Giandam na sa kapulisan sa Sta. Ana ang posible nga kaso nga ipasaka batok sa suspek.