BIBO, hugyaw ug lingaw! Kini ang nibalot sa kagabhion sa Lanes Kalapyahan didto sa Barangay Dahican sa Mati City, Davao Oriental Hunyo 10-11, 2023.

Sa impormasyon gikan sa Mati City Information Office, malampuson nga natapos ang SummerFrolic 2023 diin liboan ka mga turista ang midayo aron makigduyog sa maong rave party nga naundang sulod sa duha ka tuig tungod sa pandemya sa Covid-19.

Gihulagway sa mga frolickers nga bibo, hugyaw ug lingaw gayod ang event diin ang mga nahisgutan naggikan pa sa lagyong lugar sama sa Davao, Manila, Cebu, Australia ug uban pa aron makiglingaw-lingaw ug masaksihan ang "two-night party" sa SummerFrolic 2023 ug ang kanindot sa Dakbayan sa Mati.

Ang SummerFrolic gikonsiderar nga usa sa labing gipaabot nga summer event sa Southern Philippines.

Mas dako ug mas bongga ang 2023 nga edisyon sa SummerFrolic nga gitawag nga "Phoenix Revolution" ang nasinati sa mga frolickers diin kini giduyogan sa mga internasyonal DJ’s sama nila DJ Bonka, Marnik, Standerwick, ug Sandro Silva.

Apan gawas sa kalingawan ug party aduna pay dakong mensahe ang gipahigayong SummerFrolic sa katawhan nga mao ang pagselebrar sa kinabuhi ug pagtabang sa pagpreserba niini tungod kay ang Mati dili lamang abunda sa mga nindot na talan-awon o limpyo nga dagat ug puti na balas, apan puluy-anan usab kini sa mananglahing marine animals sama sa mga pawikan.

Atol sa selebrasyon, mananglahing local products usab ang gi-showcase ug gipamaligya sama sa pagkaon, abaca bags, abaca baskets, shell bracelets, mga sinina ug uban pa. (Cerlyn Cabanit/CIO Mati)