KIDAPAWAN CITY -- Sa ikatulong higayon, gibisita ni Senador Christopher Lawrence "Bong" Go ang probinsiya sa North Cotabato aron manghatag og tabang kagahapon sa buntag, Lunes, Nobyembre 4.

Unang gihimamat ni Go ang mga bakwit sa Barangay Ilomavis, Kidapawan City, human nabalaka pag-ayo sa ilang kahimtang tungod sa padayong pagtay-og sa linog ug ilabi na nga naa sila sa tiilan sa Mount Apo.

Mas nahupay ang kaguol nga gibati sa mga biktima human gibutyag sa senador nga aduna siyay dala nga pasiunang tabang alang kanila.

Misamot paghugyaw ang mga biktima human gipaguwa ni Go ang iyang kauban nga mao ang aktor nga si Robin Padilla ug nag-duet sila og kanta nga "Maging Sino Ka Man."

Si Go nagbutyag sab sa ambush interview nga gikan pa siya sa nasud sa Thailand ug miuna lamang kang Presidente Rodrigo Duterte kay aduna silay sesyon sa Senado Lunes sa hapon, Nobyembre 4.

Si Barangay Ilomavis Kapitan Jimmy Mantawil nagbutyag nga di lang angayang mabalaka ang 5 mil ka mga pamilyang mihiklin sa ilang balay sanglit wa sila pasagdi sa lokal ug nasyonal nga gobyerno.

Apektado sab ang turismo sa ilang lugar sanglit di na masudlan ang Lake Agco nga maoy sagad ginadayo sa mga gustong maligo sa hot and cold spring water.

Gidili na sa lokal nga gobyerno ang pagsaka sa lugar sanglit daghang liki sa yuta ang nakita kilid sa mga bakilid nga parte sa dalan.

Samtang human sa Ilomavis, milahos ang senador didto sa Barangay Poblacion, Makilala, kon diin anaa sab ang gatusan ka mga pamilyang misilong sa mga tunghaan. (Orlando B. Dinoy)