DAVAO DEL SUR -- Gimando na sa liderato sa Davao del Sur Police Provincial Office (DSPPO) ang imbestigasyon aron mailhan ang nagpaluyo sa giingong “Bunal Squad” sa dakbayan sa Digos.

Sumala ni Police Colonel Alberto Lupaz, officer-in-charge sa DSPPO, nga gitahasan na niya ang kapulisan nga mas palapdan pa ang pagpatrolya aron daling masikop ang mga tawong nagpaluyo niini.

Kahihumdoman nga nag-viral sa social media ang upat ka motorsiklo diin adunay angkas ang mga drayber niini ug gipanggukod ang mga batan-on nga naglatagaw sa kagabhion.

Niani og kabalaka sa ubang molupyo ang insidente human nabalaka nga madamay ang uban nga nanarbaho panahon sa kagabhion.

Mas gipalig-on sab sa mga awtoridad ang implementasyon sa curfew hours aron masegurong wa nay mga menor de edad nga anaa sa mga internet cafe panahon sa dis-oras sa kagabhion.

Samtang, giawhag sa kapulisan ang publiko nga di magpataka og post sa social media aron di moresulta sa pagka-alarma sa publiko. (Orlando B. Dinoy)