KIDAPAWAN CITY -- Nanghasi na usab ang mga komunista nga pundok sa probinsiya sa Cotabato alas 10:15 sa gabii niadtong Sabado.

Sa taho gikan sa 901st Brigade nga gipabuthan sa mga miyembro sa New People’s Army (NPA) ang outpost sa Citizen Armed Forces Geographical Unit (Cafgu) utlanan sa Arakan Valley sa North Cotabato ug probinsiya sa Bukidnon.

Apan nakabantay dayon ang mga Cafgu nga mibalos sa pagpabuto sa ilang mga hinagiban batok sa mga rebelde.

Milungtad og 20-minutos ang sinukliay sa mga bala tali sa duha ka pundok gamit ang mga tag-as nga matang sa armas.

Miatras sab dayon ang mga rebelde sa diha nga sila nakatimaho nga nagresponde ang mga sundalo.

Wala'y nasuta nga naangol o napatay sa mga Cafgu, samtang dili matino sa mga NPA ubos sa Pulang Bagani Command nga kanhi gipangulohan sa napatay nga si Kumander Parago.

Sa kasamtangan, hugtanon nga nagbantay ang mga Cafgu, pulis, Barangay Peace Action Team ug mga sundalo sa posibling sorprisa nga pagpangatake sa NPA ilabina nga nagsingabot ang ilang anibersaryo.