MAHITABO Sabado, Hulyo 31, 2021, ang usa ka dakong caravan sa "Ituloy ang Pagbabago Movement" (IPM) 2022 sa Davao Region kon diin salmutan kini sa nagkadaiyang grupo gikan sa Malita, Davao Occidental hangtud sa Montevista, Davao de Oro.

Niadtong Hulyo 29, gihan-ay na pinaagi sa usa ka coordination meeting didto sa headquarters ni National Vice Chairman sa IPM ug Liga ng mga Barangay President Kapitan Edgar Ramos Ibuyan sa Barangay 5-A, Bankerohan, Davao City aron nga mas han-ay kini karong adlawa.

Mga nagkadaiyang grupo gikan sa mga probinsiya ug kasiyudaran sa Davao Region ang mosalmot, diin ilang ibalandra sa publiko ang ilang "lunod-patay" nga pagsuporta ug panawagan kang Davao City Mayor Sara Duterte nga padaganon isip presidente sa nasud sa 2022 elections.

Ang gikan sa Malita nga grupo magrekorida padung sa Montevista dungan sa ubang mga grupo nga magrekorida sab.

Mag-abot ang tanang grupo sa Montevista alang sa usa ka programa diha sa tumong sa pag-engganyo kang Mayor Sara ug sa pagpanguha og suporta sa katawhan.

Dako sab ang kalipay ni IPM2022 National Chairman ug Davao Occidental Governor Claude P. Bautista sa kadasig sa tanang miyembro ug sa mga nangulo sa nagkadaiyang grupo.

Nanghinaot si Bautista nga mao kini ang sinugdanan sa panaghugpong sa katawhan aron malig-on ang usa ka suporta pag-abot sa panahon nga molansad na si Mayor Sara Duterte sa usa ka labing taas nga posisyon sa politika sa nasud. (Jeepy P. Compio)