ANG Department of Social Welfare and Development (DSWD) Field Office-Davao Region nagpagawas og P100,000 sa usa ka centenarian sa Mati City, Davao Oriental sa miaging semana.

Sumala sa gilatid sa Republic Act 10868 o ang Centenarians Act of 2016, ang mga centenarian, adunahan o kabus, nagpuyo sa nasud o sa gawas sa nasud, adunay katungod nga makadawat og P100,000.

Kini isip mao ang ilang “centenarian gift”, diin apil niini ang ilang mga insentibo nga gihatag sa mga hingtungdang local government units (LGUs), ingon man usa ka Letter of Felicitation gikan sa Presidente.

Mitambong atol sa maong aktibidad sila si Mati City Mayor Michelle N. Rabat ug pipila ka representante sa DSWD-Davao Region pinangulohan ni Maria Victoria N. Arancon sa Social Pension Program Management Office.

Sa talaan sa DSWD-Davao Region, anaa sa singkuwenta ka mga centenarians gikan sa Davao Region ang makadawat sa ilang centenarian gifts karong tuiga.

Ang netizen nga si Roselyn Calipayan-Lacson nangandoy nga ang iyang apohan nga mga 100-anyos karong umaabot nga Nobyembre 2023 maapil sa maong benepisyo.

"Unta maapil ang akong lola, this coming November 2023 mag 100-years old na akong lola," sa comment section sa post sa DSWD Region XI Facebook page.