GITUOHANG manager ug CEO, lakip ang usa ka babaye nga kauban niini, ang wala pa makita ning kasamtangan human sila giingong gipangkidnap sa wala mailhing kalalakihan alas 12:14 sa tungang gabii niadtong Martes, Oktubre 15, didto sa National Highway, Jose P. Laurel Avenue, Panabo City.

Subay sa impormasyon gikan sa journal sa Police Regional Office-Davao nga dunay usa ka itom nga Nissan Terra dunay plate number LAF 6850 ang giabandona kilid sa National Highway sa Kilometro 31 sa dapit diin natusak-tusak kini sa pinusilan.

Sa pagsubay sa kapulisan, walay bisan usa ka tawo ang anaa sa sakyanan, apan subay sa mga testigo, dihang natigayon ang buto-buto sa pusil, nakadagan ang usa ka lalaki ug usa ka babaye nga sakay sa Nissan, apan gigukod sa mga suspek nga sakay sa usa sab ka itom nga pick-up.

Gipugos og pasakay ang duruha ug gilayong misutoy og padagan ang pick-up padung sa direksiyon sa Davao City.

Pagka-ala 1:05 sa kaadlawon, usa ka Shawn Samonte Calimbo ang midangop sa Panabo City Police Station, uban sa usa ka Dodong Remy, nagpailang ahente sa National Bureau of Investigation, diin mihangyo nga ipatala ang hitabo.

Saysay ni Calimbo ug Remy nga usa ka Dianne Ongcal ang babaye nga gidagit, kinsa giingong nag-text pa kanila nga anaa sila sa kamot sa grupo nga si alyas Angel.

Si Ongcal nagkanayon sa text nga "Shawn tabang, mamatay ko diri-a," ug pipila ka minuto ang milabay, wala na siya makontak.

Sa ulahing progress report nga gipagula sa Panabo City police buntag sa adlaw nga Martes, mipatim-aw ang usa ka Ronald Branzuela, alyas Ron-Ron, 27-anyos, kinsa miangkon nga siya ang nagdala sa Nissan Terra dunay plate number LAF 6850 ngadto sa usa ka Necron Natividad Tamot didto sa 3N1 Lodging House sa Barangay Cagangohan, Panabo City kay arkilahan kini.

Nakurat na lang si Ron-Ron dihang gipahibalo siya sa iyang kabanay nga taga Monkayo, Compostela Valley nga si Necron gipusil diin ang gisakyan niini nga Nissan Terra natusak-tusak na sa bala.

Ang lalaki nga gikidnap uban sa babaye nasuta nga mao si Necron Natividad Tamo, samtang ang babaye nailhan sab nga si Dianne Ongcal.

Sa usa ka post sa social media niadtong Oktubre 12, tulo ka adlaw una ang pagdagit sa mga nahisgutan, usa ka netizen ang nag-post sa iyang Facebook account nga nagpasabot nga iyaha nang ginalihok ang legal nga paagi sa pagpasaka og kaso batok kang Necron ug sa giingong babaye nga si Ongcal gumikan sa P42 milyon nga salapi nga wala suma pa na-refund ni Necron gikan sa iyang mga investors.

Sa maong post, makita ang duha ka hulagway nga anaa ang usa ka lalaki nga gituohang si Necron ug usa ka babaye nga gituohang si Ongcal.

Oktubre 10 naa sab post sa social media nga naghangyo nga unta madali na og pay-out ni Necron Natividad Tamot ang ilang salapi nga gi-invest gumikan dugay na suma pa nga nagsige og saad si Necro nga mahatag na ang salapi sa mga investors.

Sukad sa pagsulat ning balita, wala pay katikaran ang kapulisan labot sa gidalhan sa mga biktima ug blangko pa sab sila sa matudlong mga suspetsado.

Makuting imbestigasyon karon ang gihimo sa kapulisan labot sa maong hitabo.