DUHA ka mga gambalay ang naugdaw gumikan sa napasagdan nga nakasaksak nga charger sa cellphone alas 8 kagahapon sa buntag didto sa Remco Village, Barangay Panacan, Davao City.

Si Senior Fire Officer (SFO) 2 Ronilo Credo, investigator sa Panacan Fire Station, mibutyag nga gipanag-iyahan ang maong gambalay ni Ariel Dumdom diin usa niini ang ilang balay ug tindahan.

Sa report sa Super Radyo Davao, gisaysay ni Credo nga gituohan nga ang napasagdan nga gisaksak nga charger sa cellphone sa ikaduhang andana sa maong balay ang hinungdan sa pag-ulbo sa kalayo.

Sa kapaspas sa kabomberohan sa dakbayan nga miresponde, wala na kakanit pa ang kalayo sa mga silingan nga balay sa nasunog.

Walay natala nga angol sa insidente apan midanyos kini og P285 mil. (Jeepy P. Compio)