GIKANAYON sa buhatan ni Davao City Mayor Sara Duterte-Carpio nga si City Information Office (CIO) head Jefry Tupas miluwat sa iyang katungdanan apan gitaktak sab sa posisyon human nalambigit sa drug raid sa beach party niadtong Dominggo, Nobyembre 6, didto sa Mabini, Davao de Oro Province.

"Last Sunday, Jefry signified his resignation and on the same moment, he was informed that he is terminated from work with the City Government of Davao," matud pa sa buhatan sa mayor sa pahayag niadtong Nobyembre 9.

Ang siyudad wala na mihatag og dugang impormasyon sa detalye sa ronda nga ang ginsakpan lang sa Philippine Drug Enforcement Agency (PDEA)-Davao de Oro ug ni Tupas ang nasayud.

Una sa iyang pagluwat, si Tupas, sa usa ka mensahe nga giduso ngadto sa media gabii niadtong Lunes, Nobyembre 8, nagkompirma nga tua siya sa beach party sa resort sa Barangay Pindasan, Mabini, Davao de Oro niadtong Sabado, Nobyembre 6, kon diin P1.5 milyon nga kantidad sa party drugs ang nasakmit sa mga awtoridad.

Gikompirma ni Tupas ang iyang presensiya una ang ronda, nga miresulta sa pagkasikop sa 17 ka mga indibiduwal tungod sa pagkasakmit sa mga ilegal nga druga.

"I was there because like the other guests, I was invited. But I left right after dinner with my boyfriend and another friend," matud sa information officer.

Kini maoy tubag sa alegasyon nga apil siya nga nadakpan sa beach party.

Wala na mohatag og dugang impormasyon si Tupas.

Nag-deactivate na siya sa iyang Facebook account human sa insidente.

Nagsilbi si Tupas isip CIO head niadtong 2016. Una nagserbi sa gobyerno, nahimo siyang peryodista sa lokal ug national media. (RGL)